addthis

تعديل

lundi 28 octobre 2013

حلقة باسم يوسف و الغضب الذي تلاها .. سيناريو متفق عليه



مازالت ردود الأفعال الجنونية للحلقة الأولى من الموسم الثالث للبرنامج الساخر “البرنامج”، الذي يقدمه الإعلامي باسم يوسف، تتوالى. فبعد الغضب العنيف الذي أثارته الحلقة من مؤيدي ثورة ٣٠/٦ و محبي الفريق الأول عبد الفتاح السيسي، بدأت بعض الحركات و الحملات في تقديم بلاغات رسمية ضد “البرنامج” و ضد باسم يوسف بل و ضد قناة CBC و مالكها،

و لكنك ستندهش عندما تعلم أن الأحداث الدائرة الآن فيما يخص باسم يوسف و برنامجه، ما هي إلا سيناريو محكم، يدور بموافقة القوات المسلحة و مباركتها و يهدف لخدمة مصالحها. تمكنت “الرهوان” من الحديث مع أحد القائمين على برنامج “البرنامج” الذي أفصح عن مكالمة تليفونية جمعت باسم يوسف شخصياً مع شخصية رفيعة المستوى من القوات المسلحة، قبل إذاعة الحلقة الأولى من البرنامج، و جاء نصها كالآتي:

باسم: مساء الخير يافندم
الشخصية الرفيعة: مساء الخير يا باسم، مبروك على الموسم التاني و يهمنا إنك تعود للتألق من جديد
باسم: يافندم ألف شكر .. دة أنا اللي يهمني رضاكم عن “البرنامج” و عني
الشخصية الرفيعة: لا ماتقلقش، كله هايكون تمام إن شاء الله
باسم: إن شاء الله، بس برضو عاوز حضرتك تطمني و نخلي الأمور على نور علشان مايحصلش لخبطة أو سوء تفاهم و حضرتك أو سيادة الفريق تزعلوا مني
الشخصية الرفيعة: ولو إني واثق فيك يا باسم، بس حاضر .. قول لي .. إنتو ناويين على ايه؟
باسم: حلقة خفيفة يافندم، شوية تريقة على مرسي و على الإخوان المسلمين
الشخصية الرفيعة: هايل هايل
باسم: و هانعدي على موضوع ٣٠/٦ دة بسرعة
الشخصية الرفيعة: و ماله، مفيش مانع
باسم: و نكتتين تلاتة على المستشار عدلي منصور
الشخصية الرفيعة: خد راحتك خالص
باسم: و ….. بعد إذن حضرتك يعني …. هانتدلع شوية كدة على سعة صدر سيادة الفريق السيسي
الشخصية الرفيعة: ممممم .. آه … ماشي … بس إطلعني كدة على اللي بتفكروا فيه في الجزء دة!
باسم: أبداً يافندم، حتة كدة على موضوع الشوكولاتة و على مبالغة المشاهير في الدعم
الشخصية الرفيعة: آه آه … دة كلام ممتاز جداً .. إحنا عاوزينك تعمل كدة!
باسم: صحيح يافندم؟ طب الحمد لله، دة أنا كنت قلقان جداً و بقالي يومين مابانامش!
الشخصية الرفيعة: ليه بس كدة يا باسم يا إبني! دي حاجات كلها دمها خفيف و إحنا نحب إن الناس تفرفش و تنبسط
باسم: والله أنا قلت إن حضراتكم متفتحين و مستحيل تزعلوا من هزار على الشوكولاتة أو الأوبريت أو البنطلون أو ال…
الشخصية الرفيعة: بنطلون ايه؟!
باسم: بنطلون الفريق السيسي يافندم!
الشخصية الرفيعة: ماله؟
باسم: لأ مالوش .. إكمنه بس بيرفعه زيادة حبة و…
الشخصية الرفيعة: لا لا لا لا … كدة هاتزعلني منك يا باسم! معقول تعمل سخرية رخيصة زي دي؟! دي حاجة بتاعة ربنا. ربنا خلق لسيادة الفريق عضمتين مرتفعتين شوية! نقوم نسخر من الراجل و نتريق عليه؟!
باسم: لأ عندك حق يافندم .. أنا آسف .. بلاش الموضوع دة! بس حضرتك قلت إنكم عاوزينني أعمل كدة! ممكن أفهم أكتر؟!
الشخصية الرفيعة: بص يا باسم يا إبني! إنت مستحيل تطلع في البرنامج بتاعك بعد الغيبة دي كلها و تتجاهل كل حاجة حصلت و دي حاجة إحنا متفهمينها. و كمان إحنا مستحيل نطلع بصورة اللي بيكتموا الحريات و يتعسفوا مع المبدعين و عشان كدة هانسمحلك. بس ضروري برضو أنا و إنت نتفق على السيناريو و نحدد الخطوات مع بعض. ولا ايه؟

باسم: آه طبعاً ضروري يافندم. يعني أنا أطلع في البرنامج و آخد حريتي؟
الشخصية الرفيعة: خد حريتك على الآخر .. بس بلاش البنطلون!
باسم: بلاش البنطلون يافندم .. طب حضراتكم هايكون رد فعلكم ايه بعد الحلقة؟
الشخصية الرفيعة: إحنا هانسكت خالص .. بس في ناس تانية مش هاتسكت!
باسم: زي مين؟
الشخصية الرفيعة: زي الممثلة الهضبة دي اللي بتطلع تتف عالممثلين كلهم في رمضان!
باسم: مين يافندم؟! روجينا؟!
الشخصية الرفيعة: لأ دي اللي بترقع بالصوت، التانية اللي معاها بقى ..
باسم: غادة عبد الرازق؟
الشخصية الرفيعة: أيووة، هي دي .. و كمان الإعلامية اللي شبه هالة سرحان بس أضيق شوية!
باسم: مين يافندم؟
الشخصية الرفيعة: اللي بتطلع على القناة اللي ماحدش بيشوفها دي!
باسم: لأ مش عارف حضرتك قصدك مين!
الشخصية الرفيعة: استنى هاسأل حد هنا في المكتب …. إنت يابني! اسمها ايه الست اللي جيبتوهالنا عالكومبيوتر إمبارح مع فيديوهات ناشيونال جيوجرافيك؟! … أيوة …. اسمها “لولا العميا” يا باسم

باسم: لولا العميا!! دي إعلامية يا فندم؟
الشخصية الرفيعة: لأ إستنى …. ماتفسر الكلام يا إبني مش سامع .. الخرسا؟! ….. لولا الخرسا يا باسم .. إسمها لولا الخرسا .. مش عارف بيجيبوا الأسامي دي منين .. اللي عكاشة واللي درديري واللي خياط واللي خرسا!
باسم: رولا خرسا يافندم اسمها .. عرفتها خلاص!
الشخصية الرفيعة: أيوة أهم هم دول .. و شوية ناس على الفيسبوك و شوية عالبتاع التاني أبو حمامة زرقا و كدة يعني .. مفيش حاجة وحشة يعني!
باسم: مين أبو حمامة زرقا دة يافندم؟! … آه … قصدك تويتر .. ماشي. طب دة كلام مقدور عليه و متعودين عليه يافندم .. ربنا يطمنك
الشخصية الرفيعة: شوفت بقى؟ يمكن يتقدم عليك كام بلاغ على كام قضية كدة .. العادي يعني!
باسم: ….. كدة و كدة يعني؟!
الشخصية الرفيعة: لأ بجد طبعاً .. الموضوع لازم يكون محبوك يا باسم!
باسم: آه … يعني موضوع البلاغات دة هايروح لفين؟
الشخصية الرفيعة: للنيابة طبعاً
باسم: و بعد النيابة؟
الشخصية الرفيعة: غالباً هتاخد ١٥ يوم على ذمة التحقيق!
باسم: هاهاهاهاهاهاهاهاهاها
الشخصية الرفيعة: …………..
باسم: حضرتك بتهزر .. صح؟
الشخصية الرفيعة: بهزر يعني ايه؟! إنت عمرك سمعت عن شخصية رفيعة بتهزر؟
باسم: يعني هاتحبسوني بجد؟
الشخصية الرفيعة: ماتخافش يا باسم، دة كله سيناريو و أنا بتفق معاك عليه .. أمال أنا بكلمك ليه بس!
باسم: أيوة يافندم .. يعني أنا مش هادخل الحبس؟
الشخصية الرفيعة: لأ هاتدخل طبعاً .. بس دة سيناريوووو .. إفهم بقى .. أنا اللي أعرفه عنك إنك شخص ذكي!
باسم: أيوة يافندم .. بس دة حبس و مش موضوع بسيط يعني .. أعذرني حضرتك .. بس أنا متوتر جداً دلوقتي!
الشخصية الرفيعة: يا راجل كبر دماغك أمال و بص لبعيد .. دي كلها ١٥ يوم!
باسم: و بعد ال١٥ يوم؟
الشخصية الرفيعة: ماتقلقش .. هانخلص الموضوع بسرعة!
باسم: و أخرج و أرجع للبرنامج و آخد راحتي؟
الشخصية الرفيعة: والله دي حاجة ترجع للمحكمة
باسم: محكمة ايه بس يافندم؟ مش حضرتك قلت لي هانخلص الموضوع بسرعة؟
الشخصية الرفيعة: أيوة يعني مش هتاخد تجديد حبس و هانحولك على القضايا المستعجلة على طول
باسم: و الحكم؟!
الشخصية الرفيعة: الحكم بيد الله بقى! هو إنت برضو تعرف عننا التدخل في أحكام القضاء؟! يا إبني الإتهامات دي غلط و مش هاتفيد موقفك في القضية!
باسم: قضية!!! هي خلاص بقيت قضية؟! يعني أنا ممكن أتسجن؟
الشخصية الرفيعة: إنت غالباً هاتتسجن بس دي حاجة في علم الغيب بقى .. أما نشوف!
باسم: طب بعد ماتسجن! سيادة الفريق هايتدخل و يخرجني عشان الناس تقول عليه متسامح و راعي حرية الإعلام و كدة يعني؟
الشخصية الرفيعة: عيب يا باسم! دي كانت حركات مبارك! إحنا دلوقتي بنبدأ عهد جديد من الصراحة و المصالحة.
باسم: لأ .. يبقى بلاش منها الحلقة دي خالص .. أنا أقلب على مصر و غانا و شوية على حزب النور و خلاص!
الشخصية الرفيعة: ماينفعش!
باسم: ليه؟!
الشخصية الرفيعة: عشان الأستاذة تغريد عبد الباسط و الأستاذة سوكا العارجة متحفظين دورهم و خلاص .. ماينفعش نرجع في كلامنا معاهم!
باسم: مين دول كمان؟
الشخصية الرفيعة: الممثلة الضخمة و المذيعة الكنزة اللي قلت لك عليهم!
باسم: و هو عشان ماينفعش ترجعوا في كلامكم يبقى أنا أتسجن؟!
الشخصية الرفيعة: دي ضريبة الحرية يا باسم و عشان كلنا ننعم بيها لازم تدفعها إنت لوحدك!
باسم: لله الأمر من قبل و من بعد! طب أنا دلوقتي مش فاهم حضرتك كلمتني ليه! مانا كدة كدة كنت هاقول اللي عندي و كدة كدة غادة عبد الرازق و رولا الكتعة كانوا هايعملوا اللي هايعملوه! ايه لازمة المكالمة الطويلة دي يعني؟
الشخصية الرفيعة: أنا بس حبيت أتأكد إنك مش هاتجيب سيرة البنطلون

إلى هنا إنتهت المكالمة و من خلال تلك المعلومات نحب أن نؤكد أن كل ما يحدث و ما سيحدث حتى لحظة القبض على باسم يوسف، ما هو إلا سيناريو باسم شريك فيه و لذلك فلا داعي لإدعاء البطولة و المخاطرة الإعلامية و لنتابع جميعاً هذا الفيلم بهدوء و بدون إنفعال زائد.